खानापूर, [17 जानेवारी] : सीमालढ्यातील हुतात्म्यांना अभिवादन करण्यासाठी आयोजित कार्यक्रमात मराठी भाषिकांनी एकत्र येण्याचे महत्त्व अधोरेखित केले. यावेळी मराठी नेत्यांनी सीमा संघर्षातील हुतात्म्यांना खऱ्या अर्थाने श्रद्धांजली अर्पण करण्यासाठी भाषिक विभागाचे वेगळेपण सोडून एकत्र येणे आवश्यक असल्याचे मत व्यक्त केले.
नागाप्पा होसुरकर स्मारकासमोर सीमालढ्यातील हुतात्म्यांना अभिवादन करण्यात आले. उपस्थित समिती नेत्यांनी स्मारकास पुष्पचक्र व पुष्पहार अर्पण केले. यावेळी माजी आमदार दिगंबर पाटील यांनी भाषण करतांना, सीमालढा जिवंत ठेवण्यासाठी हुतात्म्यांचे स्मरण अत्यंत आवश्यक असल्याचे सांगितले. “हुतात्म्यांचा संघर्ष आम्हाला एकजूट होण्याची प्रेरणा देतो,” असे ते म्हणाले.
कार्यक्रमात संयुक्त महाराष्ट्राच्या घोषणाही देण्यात आल्या.
प्रसंगी तालुका म.ए. समितीचे अध्यक्ष गोपाळ देसाई, कार्याध्यक्ष मुरलीधर पाटील, सरचिटणीस आबासाहेब दळवी, सहचिटणीस रणजीत पाटील, खजिनदार संजीव पाटील, पांडुरंग सावंत, नारायण कापोलकर, गोपाळ पाटील, विठ्ठल गुरव, बाळासाहेब शेलार, ॲड. अरूण सरदेसाई, विलास बेळगावकर, पुंडलिक कारलगेकर, जग्गनाथ बिर्जे, प्रकाश चव्हाण, चंद्रकांत देसाई, मऱ्याप्पा पाटील यांच्यासह अनेक कार्यकर्ते उपस्थित होते.
खानापूर तालुका समितीचे नेते व कार्यकर्त्यांनी कोल्हापूर येथील अभिवादन आणि जिल्हाधिकारी कार्यालयासमोरील धरणे आंदोलनात देखील सक्रियपणे सहभाग घेतला.
या कार्यक्रमाद्वारे सीमालढ्यातील हुतात्म्यांच्या योगदानाचा गौरव करण्यात आला असून, मराठी भाषिक समाजाने एकजुटीने पुन्हा एकदा लढ्याला नवी उभारी देण्याची आवश्यकता व्यक्त केली.
