खानापूर : आज सकाळी खानापूर शहरातील मयेकर नगर परिसर आणि रेल्वे स्टेशनजवळ हत्ती दिसल्याने परिसरात एकच खळबळ उडाली. सकाळच्या सुमारास नागरिकांना रस्त्यालगत हत्ती फिरताना दिसला, त्यामुळे स्थानिकांमध्ये भीतीचे वातावरण निर्माण झाले.
मिळालेल्या माहितीनुसार, हत्ती प्रथम मयेकर नगर आणि रेल्वे स्टेशन परिसरात दिसून आला. त्यानंतर तो मनसापूर दिशेने जात असल्याचे नागरिकांनी सांगितले. हत्तीचा वावर लक्षात येताच अनेकांनी सुरक्षित अंतर ठेवत त्याचे व्हिडिओ आणि फोटो काढले.
घटनेची माहिती वनविभागाला देण्यात आली असून अधिकारी परिस्थितीवर लक्ष ठेवून आहेत. नागरिकांनी घाबरून न जाता सावधगिरी बाळगावी, हत्तीच्या जवळ जाण्याचा प्रयत्न करू नये तसेच अफवा पसरवू नयेत, असे आवाहन प्रशासनाकडून करण्यात आले आहे.
दरम्यान, शहराजवळ अचानक हत्ती दिसल्यामुळे परिसरातील नागरिकांमध्ये भीतीचे वातावरण पसरले आहे. वनविभाग हत्तीला सुरक्षितपणे जंगलाच्या दिशेने वळविण्याचे प्रयत्न करत आहे.
