बेळगाव : हातपाय धुण्यासाठी गेलेल्या विद्यार्थ्याचा पाय घसरून खणीत पडल्याने मृत्यू झाल्याची दुर्दैवी घटना नावगे (ता. बेळगाव) येथे रविवारी (दि. १६) सायंकाळी घडली. महादेव हणमंत पाटील (वय १४, रा. बहाद्दरवाडी) असे मृत मुलाचे नाव आहे.
महादेव आपल्या धाकट्या भावासह नावगे शिवारातील शेतवडीत गेला होता. फिरून झाल्यानंतर दोघे बाजूच्या खणीत हातपाय धुण्यासाठी गेले. यावेळी महादेवचा पाय घसरून तो पाण्याने भरलेल्या खणीत पडला आणि बुडून त्याचा मृत्यू झाला.
घरी परतल्यानंतर महादेव दिसत नसल्याने त्याच्या वडिलांनी धाकट्या भावाकडे विचारणा केली. त्याने हा प्रकार सांगताच आईने हंबरडा फोडला. वडिलांनी गावकऱ्यांना माहिती दिली. वडगाव पोलिसांनी घटनास्थळी धाव घेतली. स्थानिकांच्या मदतीने शोध घेतल्यावर खणीत महादेवचा मृतदेह सापडला.
या घटनेची नोंद वडगाव पोलिस ठाण्यात करण्यात आली असून उपनिरीक्षक लक्काप्पा जोडट्टी पुढील तपास करत आहेत.
