बेळगाव : बाप्पाची मूर्ती घेऊन जाणाऱ्या ट्रॅक्टरचे अचानक नियंत्रण सुटल्याने ट्रॅक्टरखाली सापडून एका गणेश भक्ताचा दुर्दैवी मृत्यू झाल्याची घटना कपिलेश्वर उड्डाणपूलावर बुधवारी सकाळी 10 वाजण्याच्या सुमारास घडली आहे. दुर्देवी गणेश भक्त सुळगा येथून असून त्यांचे नांव सदानंद बी.पाटील असे आहे.
मिळालेल्या माहितीनुसार, विसर्जन मिरवणूक सुरू असताना सकाळी 10 वाजण्याच्या सुमारास उड्डाण पुलाच्या उतारावर ट्रॉलीमधून बाप्पाची मूर्ती घेऊन जाणारा एक ट्रॅक्टरचे अचानक नियंत्रण सुटल्याने ट्रॅक्टर वेगाने पुढे गेला. त्यात बेसावध असलेल्या सदानंद याला ट्रॅक्टरची धडक बसली आणि तो ट्रॅक्टरच्या चाकाखाली सापडला. ट्रॅक्टरचे चाक डोक्यावरून गेल्याने गंभीर जखमी झालेल्या सदानंद याला चिंताजनक अवस्थेत तातडीने जिल्हा रुग्णालयात दाखल करण्यात आले.
मात्र उपचार सुरू असतानाच त्याचा मृत्यू झाला. सदर घटनेत अन्य एक कार्यकर्ता जखमी झाल्याचे कळते.
