खानापूर (29 जून 2025) : जांबोटी-चोर्ला रस्त्यावर आज दुपारी 3 वाजण्याच्या सुमारास ग्रीन हॉटेलजवळ हब्बनहट्टी क्रॉसजवळ दुचाकी आणि कॅन्टर टेम्पो यांच्यात समोरासमोर झालेल्या भीषण अपघातात दुचाकीस्वाराचा जागीच मृत्यू झाला असून मागे बसलेला एक युवक गंभीर जखमी झाला आहे.
अपघातातील मृत्यू झालेल्या युवकाचे नाव दर्शन मोहन चव्हाण (वय 20, रेवडीहाळ, तालुका हुबळी, जिल्हा धारवाड) असे आहे. तर जखमी झालेला युवक राजू कल्लाप्पा शिरपूर असून त्याच्या डोक्याला व उजव्या हाताला गंभीर दुखापत झाली आहे. त्याच्यावर सध्या बेळगाव येथील रुग्णालयात उपचार सुरू आहेत.
प्राप्त माहितीनुसार, कंटेनर (क्र. के ए 22 ए ए 9574) चोर्ला मार्गे जांबोटी-बेळगावकडे जात असताना, टेम्पोचालक विनायक विजय कदम (वय 21, रा. कुट्टलवाडी, ता. बेळगाव) याने निष्काळजीपणे व अति वेगात वाहन चालवले. त्याचवेळी दुचाकी (क्र. के ए 63 ए एक्स 2459 स्प्लेंडर) वरून दर्शन चव्हाण व राजू शिरपूर हे दोघे चोर्ला मार्गे गोव्याकडे जात असताना दुचाकी व कॅन्टर टेम्पो यांची समोरासमोर जोरदार धडक झाली. या धडकेत दर्शन चव्हाण गंभीर जखमी झाला. त्याला तातडीने खानापूर येथील प्राथमिक आरोग्य केंद्रात दाखल करण्यात आले, मात्र डॉक्टरांनी त्याला दुपारी 3.30 वाजता मृत घोषित केले.
या अपघाताची नोंद खानापूर पोलीस ठाण्यात करण्यात आली असून पुढील तपास खानापूर पोलिसांकडून सुरू आहे.
