खानापूर: गेल्या आठवडाभरापासून पडणारा मुसळधार पाऊस पाहता बेळगाव शहरासह, बेळगाव तालुका, निपाणी, चिकोडी, कित्तूर, बैंलहोंगल आणि खानापूर तालुक्यातील सर्व शाळांना गुरुवारी (25 जुलै) आणि शुक्रवारी (26 जुलै) सुट्टी जाहीर करण्यात आली आहे.
यामध्ये सर्व अंगणवाडी, पूर्व प्राथमिक आणि प्राथमिक, माध्यमिक शाळांचा समावेश असून त्या संबंधीचा आदेश जिल्हाधिकारी मोहम्मद रोशन यांनी जारी केला आहे.
जिल्ह्यात मुसळधार ते अतिमुसळधार पाऊस पडण्याची शक्यता वर्तवण्यात आलेली आहे. जिल्ह्यातील अनेक भागात मुसळधार पाऊस सुरु असल्याने नदींच्या पाणी पातळीत वाढ झाली आहे. त्यामुळे कोणत्याही प्रकारची अनुचित घटना घडू नये तसेच अतिवृष्टीमुळे आपत्कालीन परिस्थिती निर्माण झाल्यास त्याचा परिणाम शालेय विद्यार्थ्यांवर होऊ नये याकरिता ही सुट्टी जारी करण्यात आली आहे.
