खानापूरची जीवनवाहिनी धोक्यात! मलप्रभा प्रदूषण प्रकरणात जिल्हाधिकाऱ्यांची बैठक लवकरच | ಉತ್ತರ ಕರ್ನಾಟಕದ ಜೀವನಾಡಿ ಮಲಪ್ರಭಾ ಸಂಕಷ್ಟದಲ್ಲಿ

खानापूर: तालुक्यातून वाहणाऱ्या मलप्रभा नदीच्या पाण्याबाबत गंभीर प्रश्न निर्माण झाला आहे. नदीचे पाणी मोठ्या प्रमाणात दूषित होत असल्याचा आरोप स्थानिक नागरिकांकडून करण्यात येत आहे. खानापूर शहरातील सांडपाणी, गटारातील घाण आणि विविध कचरा थेट नदीत मिसळत असल्यामुळे ही परिस्थिती निर्माण झाली आहे.

खानापूर शहरातील गटारांचे पाणी कोणतीही प्रक्रिया न करता थेट मलप्रभा नदीत सोडले जात आहे. यामध्ये प्लास्टिक, पूजेतील फुले, इतर घनकचरा तसेच स्मशानभूमीत जाळलेल्या मृतदेहांचे अवशेषही नदीकाठावर टाकले जात असल्याचा आरोप आहे. त्यामुळे नदीचे पाणी पूर्णपणे प्रदूषित झाले असून पुढे हेच पाणी शुद्धीकरण करून नागरिकांना पिण्यासाठी पुरवले जाते, अशी भीती स्थानिकाकडून व्यक्त केली जात आहे.

मलप्रभा नदी ही उत्तर कर्नाटकातील अनेक शहरांची जीवनवाहिनी मानली जाते. बेळगाव, हुबळी, धारवाड यांसह इतर भागातील नागरिक या नदीच्या पाण्यावर अवलंबून आहेत. त्यामुळे नदीचे प्रदूषण हा केवळ खानापूरपुरता मर्यादित प्रश्न नसून संपूर्ण उत्तर कर्नाटकासाठी गंभीर बाब असल्याचे स्थानिकांचे म्हणणे आहे.

काही नागरिकांनी सांगितले की, ही समस्या अनेक वर्षांपासून कायम आहे. शहरालगतून वाहणाऱ्या नदीत शौचालयांचे आणि घरगुती वापराचे सांडपाणी थेट मिसळते. त्यामुळे भविष्यात आरोग्याच्या गंभीर समस्या निर्माण होऊ शकतात. “आम्ही देखील विषारी पाणी पित आहोत का?” असा सवाल नागरिकांकडून उपस्थित केला जात आहे.

यावर जिल्हाधिकाऱ्याना विचारले असता जिल्हाधिकारी Mohammed Roshan यांनी या प्रकरणाची दखल घेत बैठक घेण्याचे आश्वासन दिले आहे. त्यांनी सांगितले की, विविध नगरपालिकांमध्ये एसटीपी (Sewage Treatment Plant), ग्रे वॉटर ट्रीटमेंट आणि फिकल स्लज मॅनेजमेंटसाठी जागा निश्चित करण्यात आली असून प्रक्रिया टेंडर टप्प्यात आहे. तसेच ज्या ठिकाणी स्मशानभूमीची कमतरता आहे, ती दूर करण्यासाठीही उपाययोजना केल्या जातील.

मलप्रभा नदीवरील साठा Malaprabha Dam (सौंदत्ती परिसरात) सुमारे 37टीएमसी क्षमतेचा असून, येथून अनेक जिल्ह्यांना पाणीपुरवठा केला जातो. त्यामुळे नदीतील प्रदूषण थांबवण्यासाठी तातडीने शुद्धीकरण प्रकल्प उभारणे आणि नदी स्वच्छता मोहीम राबवणे आवश्यक असल्याची मागणी जोर धरत आहे.

स्थानिक नागरिकांनी प्रशासनाने केवळ बैठकीपुरते आश्वासन न देता प्रत्यक्ष कृती करावी, अशी मागणी केली आहे. मलप्रभा नदीचे प्रदूषण रोखले नाही तर भविष्यात मोठ्या प्रमाणात आरोग्यविषयक संकट निर्माण होण्याची शक्यता नाकारता येत नाही.

credit : News 18 kannada

Kannada report