कुप्पटगिरी (प्रतिनिधी):
आजच्या सोशल मीडियाच्या युगात वाढदिवस साजरा करण्याच्या पद्धतीत मोठा बदल झालेला असताना, कुप्पटगिरी गावातील मनोज यल्लाप्पा पाटील यांनी एक आगळावेगळा आणि समाजोपयोगी उपक्रम राबवून आदर्श निर्माण केला आहे. त्यांनी आपल्या वाढदिवसाच्या दिवशी अनाठायी खर्च व दिखावा टाळून, त्याच थोड्या पैशात गावातील अनाथ व गरजू मुलांना आवश्यक वस्तूंचे वाटप केले.
सध्या तरुण पिढीमध्ये वाढदिवस साजरा करण्याचा प्रकार फक्त ‘लाईक्स’ मिळवण्यासाठी मोठ्या प्रमाणावर वाढला आहे. रस्त्यावर, गाड्यांवर केक कापणे, सार्वजनिक ठिकाणी गोंधळ घालणे, नद्यांवर जाऊन, हॉटेलवर जाऊन अन्नाची नासाडी करणे, दारू आणि इतर व्यसनांच्या आहारी जाणे या गोष्टी चिंतेचा विषय ठरत आहेत. यामुळे समाजात चुकीचे संदेश पसरत असून, अनेक वेळा सार्वजनिक शांततेवरही परिणाम होत आहे.
अशा परिस्थितीत, मनोज पाटील यांनी आपल्या वाढदिवसाला साधेपणाचा आणि समाजसेवेचा मार्ग निवडला. गावातील काही अनाथ पार्श्वभूमीच्या मुलांना दैनंदिन उपयोगातील वस्तू देऊन त्यांना मदतीचा हात दिला. हा उपक्रम केवळ सामाजिक भान जपत नाही, तर इतरांसाठीही प्रेरणादायी ठरतो.
या प्रसंगी श्री शिवप्रतिष्ठान हिंदुस्थान संस्थेचे कार्यकर्ते उपस्थित होते. मनोज पाटील हे फॉमोसा आयुर्वेदिक औषध केंद्रात कार्यरत असून, संपूर्ण तालुक्यात आरोग्य सेवा पोहोचवण्याचे कार्य करतात.
वाढदिवसाच्या निमित्ताने समाजासाठी काहीतरी देण्याची भावना दाखवणाऱ्या मनोज पाटील यांच्या या कार्याचे गावात कौतुक होत आहे. अशा उपक्रमांमुळे समाजात सकारात्मक बदल घडेल आणि तरुण पिढीला योग्य दिशा मिळेल, असा विश्वास व्यक्त केला जात आहे.
