खानापूरचे तहसीलदार प्रकाश श्रीधर गायकवाड यांच्या बेळगावातील निवासस्थान, कार्यालय आणि इतर ठिकाणी लोकायुक्त पोलिसांनी बुधवारी (ता. 8) छापे टाकले. या कारवाईत त्यांच्याकडे तब्बल 4 कोटी 41 लाख 12 हजार 581 रुपयांची मालमत्ता असल्याचे उघडकीस आले आहे. लोकायुक्त पोलिसांनी त्यांच्या संपत्तीचा स्रोत तपासण्याचे काम हाती घेतले असून कर्नाटक लोकायुक्त कायद्यानुसार गुन्हाही नोंदवला आहे.
8 ठिकाणी छापेमारी
बेळगावातील गणेशपूरमधील गायकवाड यांच्या ‘कुबेर’ बंगल्या, खानापूरमधील निवासस्थान, तहसीलदार कार्यालय, निपाणीतील फार्महाऊस, तसेच अकोळ येथील सासऱ्यांचे घर अशा एकूण 8 ठिकाणी लोकायुक्त पोलिसांनी एकाच वेळी छापेमारी केली. या कारवाईत मोठ्या प्रमाणावर संशयास्पद कागदपत्रे आणि संपत्ती उघड झाली आहे.
संपत्तीचे विवरण
प्रकाश गायकवाड यांच्याकडे पुढील संपत्ती आढळली आहे:
- स्थावर मालमत्ता: 3 कोटी 58 लाख (2 प्लॉट, 3 बंगले, 28 एकर शेती)
- जंगम मालमत्ता: 83 लाख 12 हजार 581 (दागिने: 25.66 लाख, वाहने: 57 लाख, रोकड: 46 हजार)
राज्यात 21 कोटींच्या मालमत्तेचा खुलासा
कर्नाटकातील विविध जिल्ह्यांमध्ये, लोकायुक्तांनी 38 ठिकाणी छापेमारी केली. यात 21 कोटी 5 लाख 15 हजार 745 रुपयांची मालमत्ता जप्त झाली. अधिकाऱ्यांनी 14 कोटी रुपयांपेक्षा अधिक रक्कम भूखंड आणि बंगले खरेदीत गुंतवली असून 2 कोटी रुपयांची वाहने आणि जवळपास 2 कोटींचे दागिनेही खरेदी केल्याचे आढळले आहे.
लोकायुक्त पोलिस तपासणी सुरू असून पुढील कारवाईसाठी संबंधित कागदपत्रांचा अभ्यास करण्यात येत आहे.
