लोणावळा: महाराष्ट्रातील लोणावळा येथे पावसाळी पर्यटनासाठी पर्यटकांचे सर्वाधिक आकर्षण असलेले भुशी धरण ओसंडून वाहत असल्याच्या बातम्या समोर येत असतानाच या धरणाच्या पाण्यात 5 जणांचा बुडून मृत्यू झाल्याची दुर्दैवी घटना घडली आहे. बुडालेल्यांमध्ये 4 ते 13 वयोगटातील तीन मुली आणि एक मुलगा आणि एका महिलेचा समावेश आहे. बचाव पथकाने महिला आणि 13 वर्षीय मुलीचे मृतदेह बाहेर काढले असून इतर तिघांचा शोध सुरू आहे.
मिळालेल्या प्राथमिक माहितीनुसार, पुण्यातील हडपसर मधील सैद नगर येथील अन्सारी कुटुंबातील काही सदस्य रविवारी पावसाळी पर्यटनासाठी भुशी धरणावर गेले होते. यावेळी हे सर्व जण धरणाच्या मागील बाजूस असलेल्या धबधब्याखाली डुबकी मारण्यासाठी गेले होते. दुपारी साडेबारा वाजता ते या धबधब्याच्या प्रवाहात उतरले. मात्र, पाण्याच्या प्रवाहाचा वेग वाढल्याने धरणाच्या मुख्य तोंडातील पाण्यात या कुटुंबातील एकूण 7 जण वाहून गेले. एक पुरुष आणि एक मुलगी पाण्यातून बाहेर पडण्यात यशस्वी झाले. मात्र दुर्दैवाने 4 ते 13 वयोगटातील तीन मुली व एक मुलगा व एक महिला पाण्यातून बाहेर पडू शकली नाही.
व्हिडिओ पहा:
या घटनेची माहिती मिळताच घटनास्थळी पोहोचलेल्या लोणावळा पोलिसांनी तत्काळ शोधमोहीम सुरू केली. मात्र, वरून कोसळणारा मुसळधार पाऊस आणि पाण्याचा जोरदार प्रवाह यामुळे या बचावकार्यात अडचणी येत आहेत. सुरुवातीच्या चार तासांच्या शोधानंतर शाहिस्ता अन्सारी (वय 25) आणि अमिमा अन्सारी (वय 13) यांचे मृतदेह पाण्यातून बाहेर काढण्यात शोध पथकाला यश आले. उर्वरित तिघांचा शोध उशिरापर्यंत सुरू होता.
5 people including 4 children drowned in Bhushi Dam
Bhushi Dam
