गुंजी यात्रेत प्रसन्न घोटगे यांची प्रमुख उपस्थिती; संकल्प फाउंडेशनच्या महाप्रसादाला भरघोस प्रतिसाद
गुंजी, (वार्ताहर): गुंजी येथील ग्रामदैवत श्री माऊलीदेवी यात्रेच्या पवित्र निमित्ताने संकल्प फाउंडेशनच्या वतीने आयोजित करण्यात आलेल्या भव्य महाप्रसादाचा लाभ सुमारे सात हजारांहून अधिक भाविकांनी घेतला. सेवाभाव आणि भक्तीभावाचा आदर्श घालून देणारा हा अन्नदान सोहळा अत्यंत यशस्वी ठरला.
प्रसन्न घोटगे यांची विशेष उपस्थिती
या सोहळ्याचे मुख्य आकर्षण ठरले ते प्रमुख पाहुणे, उद्योजक व दानशूर व्यक्तिमत्त्व श्री प्रसन्न वासुदेव घोटगे यांची उपस्थिती. श्री. घोटगे यांच्या हस्ते नैवेद्याची पूजा करून महाप्रसादाला प्रारंभ करण्यात आला. यावेळी बोलताना त्यांनी ‘अन्नदान’ हे समाजसेवेचे सर्वोच्च स्वरूप असल्याचे सांगत, संकल्प फाउंडेशनच्या निःस्वार्थ कार्याची प्रशंसा केली.
आमदार हलगेकर यांचेही योगदान
महाप्रसादाच्या आयोजनात आमदार विठ्ठलराव हलगेकर यांचेही देणगी स्वरूपात योगदान लाभले याबद्दल संकल्प फाउंडेशनच्या वतीने जल्लोष ऑर्केस्ट्राच्या मंचावर त्यांचा सत्कार करण्यात आला.
व्यवस्थापन आणि आभार प्रदर्शन
संकल्प फाउंडेशनच्या कार्यकर्त्यांनी चोख व्यवस्थापन आणि अचूक नियोजन करत भाविकांसाठी पाण्याची आणि बसण्याची उत्तम सोय केली होती. ज्यामुळे संपूर्ण उपक्रम शिस्तबद्धपणे पार पडला.
कार्यक्रमाच्या शेवटी, उपक्रमाच्या यशस्वीतेसाठी मदत करणारे प्रमुख देणगीदार श्री प्रसन्न घोटगे, माजी आ. विठ्ठलराव हलगेकर, पंचकृषितील देणगीदार आणि परिश्रम घेणाऱ्या फाउंडेशनच्या संपूर्ण टीमचे मनःपूर्वक आभार मानण्यात आले. हा महाप्रसादाचा उपक्रम सामाजिक एकोपा आणि भक्तीची जिवंत परंपरा दर्शवणारा ठरला.
